كيفية عمل التنازل لارضك في اب تاون بجهاز مدينة السادس من اكتوبر؟

إجراءات تنازل لقطعة أرض في حي أب تاون أكتوبر:

أولا: كل الإجراءات تتم في جهاز مدينة السادس من أكتوبر أمام نادي 6 أكتوبر في المركز التكنولوجي.
الجهاز يعمل من الأحد حتى الخميس، والإجازة يومي الجمعة والسبت.

قبل ما تتوجه للجهاز لازم يكون معك توكيل حديث أو مستخرج توكيل لم يمر عليه شهر.
في حال أن التوكيل تاريخه عدى عليه شهر، لازم تحدثه من نفس الشهر العقاري اللي عملته فيه قبل كده أو أي شهر عقاري مطور.
ملحوظة: لا تحتاج إلى المالك الأصيل نهائيا.

الخطوات بالتفصيل:

• هتاخد رقم خدمة عملاء الساعة 9 صباحا.

• تدخل على شباك خدمة العملاء: هيطلب منك أصل التوكيل + أصل التوكيل الحديث أو مستخرج التوكيل (لم يمر عليه شهر).

• يسحبوا منك أصل إخطار التخصيص + محضر الاستلام (يعملوا لهم سكانر على الجهاز وتستلمهم تاني).

• لازم يكون معك صور من جميع الورق: محضر الاستلام (3 صور) + بطاقتك الشخصية (3 صور).

• بعد التسجيل في شباك خدمة العملاء، هتاخد أصل الورق وتروح بيه شباك 17 للمراجعة.

• بعد كده شباك 1 للمراجعة القانونية.

• ترجع تاني للشباك اللي سجلت فيه الورق (خدمة العملاء) ويسحب منك أصل الورق.

• بعدين هيدوك ورقة تروح بيها شباك 17، وبعدها شباك 4 للمراجعة المالية، ثم الخزينة لدفع 65 جنيه.

• تستلم 2 إيصال من الخزينة: واحد يفضل معك وواحد تديه لخدمة العملاء.

• تعمل صورة من إيصال الخزينة وتطلع بها للأستاذة إيناس في الدور الثاني لقفل الطلب على الجهاز.

• بالصور اللي معك (صورة محضر الاستلام + صورة الطلب + صورة البطاقة الشخصية) تطلع الدور الثالث للأستاذ محمد مكتب (9) في إدارة التنمية.

• بعدها تطلع الدور الرابع عند إدارة التراخيص (م. مينا) علشان يقفلوا الطلب على الكمبيوتر.

بعد شهر إلى شهر ونصف بتجيلك رسالة من الجهاز علشان الدفع، والمبلغ في حدود 145 ألف جنيه.
الدفع بيكون كاش أو بفيزا.

بعد الدفع بحوالي شهرين بتجيلك رسالة لاستلام الإخطار.
وبعد استلام الإخطار باسمك، تروح لإدارة المساحة ومعك محضر الاستلام علشان يثبتوا أن الأرض أصبحت باسمك ويختموا على نفس محضر الاستلام.

مصاريف التنازل ونقل الملكية في أراضي أب تاون:
الأرقام دقيقة من جهاز مدينة السادس من أكتوبر (بعد خصم 50٪):

• 1٪ درجة أولى (أب – أم – ابن – ابنة – زوجة): حوالي 36 ألف جنيه حسب القطعة.

• 2٪ درجة ثانية (الأخ والأخت): حوالي 48 إلى 50 ألف جنيه حسب القطعة.

• باقي الدرجات 11٪: متوسط 145 ألف جنيه حسب القطعة.

كل القيم دي بعد الخصم 50٪، وكل قيمة لها حسبة معينة في الجهاز.
الخصم 50٪ ساري حتى شهر مارس 2026.